Fréttir
Starfsmenn Flugleiðasamsteypunnar og Landsbankans flokka mynt fyrir Vildarbörn
Um 130 starfsmenn Landsbankans og Flugleiðasamsteypunnar komu saman á Nordica hótelinu í gær til að flokka mynt sem farþegar Icelandair hafa gefið til Vildarbarna, ferðasjóðs barna sem búa við erfiðar aðstæður. Sjóðurinn er rúmlega ársgamall og hefur þegar gert um 20 börnum og fjölskyldum þeirra, alls rúmlega 100 manns kleift að fara í eina draumaferð, sér að kostnaðarlausu.
Gríðarlegt magn myntar hefur safnast á undanförnum mánuðum frá farþegum sem stinga afgangsmynt sinni í lítil umslög sem eru um borð í flugvélum Icelandair. Reyndar er ekki hægt að tala um afgangsmynt, því í sumum umslögunum voru umtalsverðar upphæðir, þúsundir króna, í seðlum.
Flokkunin á Nordica hótelinu stóð frá kl. 16.00 í gær og lauk um klukkan 20.00. Rífandi gangur var í starfinu allan tímann og stórir og þungir dallarnir, fullir af óflokkuðu klinki, tæmdust einn af öðrum og aðrir fylltust jafn óðum með mynt hverrar þjóðar. Búist er við að heildarfjárhæðin muni nema um 4-5 milljónum króna.
www.vildarborn.is
Sigurður Helgason forstjóri Icelandair, Peggy Helgason iðjuþjálfi og í stjórn Vildarbarna, Halldór Jón Kristjánsson bankastjóri Landsbankans og Ragnhildur Geirsdóttir framkvæmdastjóri hjá Icelandair og stjórnarformaður Vildarbarna
130 starfsmenn Landsbankans og Icelandair komu saman og lögðu Vildarbörnum lið
Nýútskrifaðar flugfreyjur Icelandair komu beint í flokkunina frá útskriftarathöfninni
