24.10.2009

Í dag, fyrsta vetrardag, er í þrettánda sinn úthlutað styrkjum úr sjóðnum Vildarbörn, styrktarsjóði Icelandair og viðskiptavina félagsins. Jafnframt er í dag kynnt nýtt merki Vildarbarna, sem Þórdís Filipsdóttir hefur hannað.

Markmið Vildarbarna er að gefa langveikum börnum og börnum sem búa við sérstakar aðstæður tækifæri til þess að fara í draumferð sem þau ættu annars ekki kost á. Nú hafa 260 fjölskyldur alls staðar að af landinu notið stuðnings frá sjóðnum.

Að þessu sinni hlutu 10 börn og fjölskyldur þeirra styrk úr sjóðnum. Í styrknum felst skemmtiferð fyrir barnið og fjölskyldu þess, og er allur kostnaður greiddur - flug, gisting, dagpeningar og aðgangseyrir að sérstökum viðburði sem barnið óskar sér. Við síðustu úthlutanir hafa mörg barnanna valið að fara til Flórída og heimsækja Disneyland.

Nýtt merki Vildarbarna sem kynnt er í dag er eftir Þórdísi Filipsdóttur, hönnuð, og byggir á hugmyndinni "frelsi og flug" og sýnir svífandi börn haldast í hendur um hjarta.

Sjóðurinn Vildarbörn er fjármagnaður með þrennskonar hætti. Í fyrsta lagi með beinu fjárframlagi Icelandair. Í öðru lagi með frjálsum framlögum félaga í Vildarklúbbi Icelandair sem geta gefið af vildarpunktum sínum. Í þriðja lagi er sjóðurinn fjármagnaður með söfnun afgangsmyntar um borð í flugvélum Icelandair.

Starfsemi Vildarbarna Icelandair byggir á hugmyndum og starfi Peggy Helgason, sem hefur um árabil unnið sem sjálfboðaliði á barnadeildum sjúkrahúsa í Reykjavík og stutt fjölskyldur fjölda veikra barna með ýmsum hætti. Hún er nú í stjórn Vildarbarna Icelandair. Verndari sjóðsins er frú Vigdís Finnbogadóttir, fyrrverandi forseti Íslands og formaður stjórnar hans er Sigurður Helgason sem nú er stjórnarformaður Icelandair Group fyrrum forstjóri félagsins.

Nánari upplýsingar um sjóðinn eru á vildarborn.is.