23.04.2007

Í dag, sumardaginn fyrsta, var 30 íslenskum börnum og fjölskyldum þeirra afhentur ferðastyrkur frá Vildarbörnum. Jafnframt voru í fyrsta sinn styrkt 10 börn frá Bandaríkjunum til utanlandsferðar. 24 börn sem hlutu styrk koma af höfuðborgarsvæðinu, en 4 börn frá Akureyri, 1 frá Grundarfirði og 1 frá Þorlákshöfn. Í ár er gert ráð fyrir að Vildarbörn muni alls styrkja 70 börn í tilefni af 70 ára afmæli Icelandair. Barninu og fjölskyldu þess er boðið í utanlandsferð að eigin vali til áfangastaða Icelandair og er allur kostnaður við ferðina greiddur, þ.e. flug, gisting, bílaleigubíll, dagpeningar og aðgangseyrir að sérstökum viðburði sem Vildarbarnið langar að upplifa. Alls hafa vel á annað hundrað börn og fjölskyldur þeirra fengið úthlutað úr sjóðnum frá stofnun hans árið 2003. Oftast hafa Vildarbörnin kosið að fara til Disney World í Florida, en ýmsir aðrir áfangastaðir hafa einnig orðið fyrir valinu.

Sjóðurinn Vildarbörn er fyrst og fremst fjármagnaður með framlögum frá farþegum Icelandair. Í ár hlaut sjóðurinn jafnframt myndarlegt framlag frá Menningasjóði Landsbanka Íslands að verðmæti 1 milljón króna. Sjóðurinn er í fyrsta lagi fjármagnaður með söfnun afgangsmyntar frá farþegum um borð í flugvélum Icelandair. Árangur þeirrar söfnunar hefur farið fram úr björtustu vonum og fyrir vikið er að þessu sinni unnt að styrkja mun fleiri börn en fyrr til utanlandsferðar ásamt fjölskyldum sínum og sérstökum aðstoðarmönnum ef á þarf að halda. Í öðru lagi með frjálsum framlögum félaga í Vildarklúbbi Icelandair sem gefa af vildarpunktum sínum. Í þriðja lagi með beinu fjárframlagi Icelandair, sem jafnframt er stofnandi og bakhjarl sjóðsins. Landsbanki Íslands annast fjárhald sjóðsins.

Tilgangur sjóðsins er að gefa langveikum börnum og börnum sem búa við sérstakar aðstæður tækifæri til að fara í draumaferð sem þau ættu annars ekki kost á. Formaður stjórnarinnar er Sigurður Helgason, fyrrverandi forstjóri Icelandair. Varaformaður sjóðsins er Halldór Jón Kristjánsson, bankastjóri Landsbanka Íslands. Verndari sjóðsins er frú Vigdís Finnbogadóttir, fyrrverandi forseti Íslands.