03.04.2014

Frá vinstri: Guðrún Bryndís Guðmundsdóttir, Yfirlæknir göngudeildar BUGL, Dóra Elín Atladóttir, forstöðumaður Vildarbarna Icelandair, Linda Kristmundsdóttir, deildarstjóri göngudeildar BUGL og Vilborg G. Guðnadóttir, deildarstjóri legudeildar BUGL

Vildarbörn Icelandair hafa fært börnum sem dvelja á barna- og unglingageðdeild Landaspítalans, BUGL, nokkrar Apple spjaldtölvur að gjöf. Velunnarri gaf Vildarbarnasjóðnum tölvurnar með ósk um að þær yrðu nýttar þar sem mikil þörf væri, og í framhaldi var ákveðið að afhenda þær á unglingageðdeildina.

Markmið sjóðsins Vildarbörn Icelandair er að gefa langveikum börnum, foreldrum þeirra og systkinum, tækifæri til þess að fara í draumaferð sem þau ættu annars ekki kost á og alls hafa 431 fjölskylda notið stuðnings frá stofnun hans.

Hann er m.a. fjármagnaður með beinu fjárframlagi Icelandair, frjálsum framlögum félaga í Saga Club Icelandair og með söfnun myntar um borð í flugvélum Icelandair. Starfsemin byggir á hugmyndum og starfi Peggy Helgason, eiginkonu Sigurðar Helgasonar, sem lengi var forstjóri Flugleiða og nú stjórnarformaður Icelandair Group, en Peggy hefur um árabil unnið sem sjálfboðaliði á barnadeildum sjúkrahúsa í Reykjavík og stutt fjölskyldur fjölda veikra barna með ýmsum hætti. Hún situr í stjórn Vildarbarna Icelandair og Sigurður formaður stjórnarinnar.